رجل كسير القلب
Pixabay

حبيبتى تخلت عني! ماذا أفعل؟

ألّفه مروة رخا تشرين الثاني (نوفمبر) 6, 2017, 06:10 صباحاً
بصراحة أنا شايف إنها باعتني وجريت وراء الفلوس مع إن أنا الحمد لله خلاص اتعينت، وعندي أراضي وأملاك وعيلتى ناس محترمة. أنا بفكر افشكل لها الخطوبة، وابعت لخطيبها صورنا أنا وهي وكل الكلام اللي بيني وبينها بس متردد. عايز أنتقم!

أنا كنت مرتبط بواحدة بحبها وهي بتحبني. كنت ناوى أطلبها للزواج بعد ما أخلص جيش لكن تمت قراءة فاتحتها وهتتخطب. حاولت أكلمها اتهربت مني.

أنا مستغرب من اللي حصل! هي رفضت عرسان كتير علشاني، وكانت دايماً واقفة جمبي وبتحبني وانا بعشقها ولسه بحبها.

 أنا مش عارف هى وافقت على العريس ده ليه. هى قالتلى الضغط عليا المرة دى كان كبير، وأنا بحاول أطفش العريس، وقعدت تقولى كمل حياتك وانتبه لحياتك. أنا مش مقتنع بالكلام ده خالص علشان تصرفتها معايا بتأكد العكس.

دي غيرت رقمها ومسحت الرسائل اللي بيني وبينها على الفيس بوك ومسحت صورها من عندي.

 بصراحة أنا شايف إنها باعتني وجريت وراء الفلوس مع إن أنا الحمد لله خلاص اتعينت، وعندي أراضي وأملاك وعيلتى ناس محترمة. أنا دلوقتى  مش قادر أتحمل اللى عملته، وإنها بتبرر وتقول "ضغطوا عليا وغصب عنى".

أنا شايف إنها وافقت على العريس علشان متوظف في البترول.

 أنا بفكر افشكل لها الخطوبة، وأبعت لخطيبها صورنا أنا وهي وكل الكلام اللي بيني وبينها بس متردد. عايز أنتقم لكن كل ما  أفتكر اللي عملته علشانى، لكن مش متقبل فكرة إنها باعتنى. قولولي أعمل ايه علشان أنا بجد مش مرتاح خالص"

عزيزي الساعي إلى الانتقام،

لا تنتقم!

سوف أفترض أولاً أنها فعلاً رضخت لضغوط أهلها وارتضت بنصيبها وقررت أن تبدأ صفحة جديدة مع عريسها. نصيحتي لك في هذه الحالة أن تفعل مثلما فعلت هي. تقبّل أن الزواج قسمة ونصيب وأن هناك طلاق تم في الكوشة وزواج تم في صالة الانتظار في المطار.

أريدك أن تؤمن بالنصيب ولو كانت هذه الفتاة نصيبك سوف تكون لك ولو بعد حين وعلى رأي المثل

"يكونوا في الكوشة ومس مقسومين لبعض"

لا تفترض سوء النية لأنها مسحت كل ما كان بينكم

لقد تقبلت الوضع وقررت أن تحترم نفسها وعريسها والخطبة والدبلة والالتزام! لم تكن لتحترمها لو كانت فتاة لعوب أو كاذبة أو غير أمينة!

لنفترض سوء النية

والآن سوف أفترض أنها قارنت بينك وبين العريس ورجحت كَفٌته. في هذه الحالة، تحمد الله إن ابتعدت عنك هذه الفتاة الجشعة المادية الزائفة.

في هذه الحالة، تأكد أن سبب ارتباطها بك هو وظيفتك وأرضك وأملاك أهلك.

أنت تستحق فتاة تحبك لنفسك وتتزوجك على الحلوة والمرة.

في كلتا الحالتين نصيحتي لك أن تنهي مرحلة الجيش وتعود إلى حياتك وتفتح قلبك حتى تقابل من تستحق حبك! البدايات الجديدة أجمل وأحلى وأرقى من الانتقام.

الانتقام طاقة سوداء سوف تحبسك في الماضي وتحيطك بطاقة سلبية مدمرة.

الرغبة في الانتقام تأكل الروح، والانتقام نفسه لن يعيد لك الحب أو السلام أو السعادة. قد تنجح في إفساد زيجتها ولكن من يضمن لك أن تعود إليك ومن يضمن لك أن تعود إليك وفي نيتها الحب ومن يضمن لك أن تكون سعيداً معها؟

إذا كانت سيئة النية وأخطأت في حقك، انتظر ... سوف يتحطم مركبها ويأتي لك النهر بجثتها.

هذا مثل حقيقي يقول في الأصل "لا تنتقم! اجلس على حافة النهر وسوف يأتيك التيار بجثة ظالمك"

Comments
Add new comment

Comment

  • Allowed HTML tags: <a href hreflang>
  • Lines and paragraphs break automatically.