الخيانة الزوجية
https://pixabay.com

زوجي “بصباص” ماذا أفعل؟

“متجوزة من حوالي خمس سنين وعندي ولد وبنت وجوازتي عادية، الجوازة تمت بسرعه خيالية، بعد الجواز اكتشفت الآتي: هو كويس جداً ومعاملته كويسه جداً بس…”

“المشكلة اللي قالبة حياتي هي حبه للستات. بيمووووت في حاجه اسمها ستات. بيبقي هيموت علي نفسه لو شاف بنت حلوة، وياسلام لو كلمته وبحكم شغله بيحتك بكل الأنواع.

في البدايه انا مكنتش عارفة اي حاجه عن الحوارات دي. فجأهً بدات اشوف تصرفات غريبة وارقام ورسايل ومقابلات.

احياناً المشكله بقي انا تعبت من كتر ما براقبه وبكتشف اللي بيعمله، وتعبت اكتر من كتر ما واجهته ويقولي “انا كده وهفضل كده مش هتغير. انا بتسلي لكن انتِ الأصل”.

بس انا قلبي واجعني والله، وكل اما اطفش واحدة الاقي اتصاحب ع غيرها. ملحوظة العلاقات دي اكترها من النت وبيكلمهم فايبر او بياخد رقمهم. مرة عملت فيها ناصحة، وعملت اكونت بنت وفضلت شهر نحب في بعض وكنت مبسوطه انه بيقضي طول الوقت تقريباً معايا ع النت.

بس اكتشف الحوار اضربت منه جامد ومن يومها وانا خايفه اعمل الحوار دا تاني. قوليلي بالله عليكي اعمل ايه انا تعبانه والله جداا خصوصاً اني مبحكيش لحد حاجه خالص، ولا حتي اهلي. أنا بثق جداا في ارائك من ايام برنامج بحب فيك إيه* متتأخريش عليا في الرد بليييز” 

عزيزتي زوجة الألعوبان

أولاً زوجك خائن! ثانياً زوجك ضربك! ثالثاً زوجك بجح!

هل تعرفين قصة “م”؟ هذه فتاة تعرفت عليها منذ سنوات عديدة على موقع من مواقع الارتباط على النت.

زوجها يقضي وقته على هذا الموقع ولا يذكر انه متزوج، ويكرر انه أعزب وأن نيته الزواج!

كنت أنا مشروع الضحية التي يتودد إليها زوج “م”، وفوجئت برسالة منها تعرفني بنفسها وتخبرني حقيقة زوجها.

مع الوقت، أصبحت أنا و”م” صديقتان، ونصحتها مرات عديدة بترك هذا الزوج ولكنها لم تتقبل وصمة الطلاق.

لم يكن يريد الإنجاب ولكن بعد سنوات عديدة وإلحاح من “م”، وافق! اليوم، بعد أكثر من 10 سنوات – هي عمر صداقتي بـ “م” –  لم يتغير زوجها ولكن صديقتي تدمّرت حياتها بسببه.

شاخت وشابت وأصبحت فريسة سهلة للأمراض. صديقتي أصابها السرطان وطبيبها يؤكد أن مرضها ليس له أي تاريخ وراثي ولا طبي سوى الضغوط النفسية التي أضعفت مناعتها!

هل تعرفين قصة “ش”؟

“ش” لم تمرض بعد ولكنها تحيا في جحيم ومعاناة يومية أفقدتها ثقتها في نفسها.

زوجها بيعاكس ويصاحب ويرافق، ويبخل عليها بالابتسامة أو الكلمة الطيبة أو اللمسة الحانية!

“ش” اليوم تصارع شيطان نفسها! “ش” فريسة سهلة لأي رجل يعطيها القليل من الاهتمام. “ش” تشعر أنها مهددة بالخطأ والخطيئة كل يوم.

ومثل “م”، “ش” لا تريد أن تصبح مطلقة وعندها أمل أن يتغير زوجها وربنا يهديه!

مشكلة زوج “م” وزوج “ش” وزوجك أنهم لا يعترفون بالخطأ ومقتنعين تماماً أن هذا “عادي” ولا يعيبهم وأن زوجاتهم “مكبرة الموضوع”, زوجك لن يتغير ولن يتوقف حتى وان أصبح عمره 70 سنة!

انظري نظرة أخرى إلى حياتك وقرري:

هل تريدين حياة مثل حياة “م” و”ش”؟ حياتك الزوجية حياة لا تقبلها امرأة في الغرب أو الشرق.

الزواج له قدسية والرجل المحترم يحترم نفسه وزوجته وأسرته!

زوجك هذا مراهق وأناني وفاقد السيطرة. ماذا قدم لك سوى الغيرة والقهر والحزن ومع الوقت سوف يقدم لك الفضائح والأمراض الجنسية ومشاعر كراهية الذات – نعم! سوف تكرهين نفسك وضعفك ورضوخك!

نصيحتي لك: اتركيه! أو اقبليه كما هو ولا تأملي في معجزة!

هل وجدت هذه المادة مفيدة؟

اترك تعليقاً

آخر التعليقات (16)

  1. بصراحه عندي حل بس مش مضمون
    بصراحه عندي حل بس مش مضمون محاوله اخيره يعني بس ينتفع
    الغيره والشك عيوب ملاحقه للزوج البصباص انا رأيي انك تهتمي بنفسك وبشكلك أكتر حسسيه ببرود او قلت اهتمام بيه واهتمام بنفسك
    بعض الخروجات الغامضة المكالمات المتأخرة خليه يشك فيكي هيضيع وقته كله وتفكيره انه يمسك طرف خبط الغلط بس اللعبه دي بمقادير اي نقص او زياده هتساوي كارثه
    كام معجب مزيف علي كم زميل جديد يقول لك يا أنسه اذا حس انك مطمع للرجال التانين هيسيب اللي ورآه ويمسك فيكي لكن أصل جمله أني بلف وارجع لك انه عارف انك هتفضلي مستنياه حسسيه انك بتضيعي بس اوعي يحس انك هتخونيه ابدااا بس يحس ان إنتي بقي ليكي معجبين

  2. تصيحتك انها تسيب زوجها ده
    تصيحتك انها تسيب زوجها ده هروب من المشكلة مش حل للمشكلة فين تذكيره بالله ومحاولة تقريبه لله والدين والكتاب والسنة والسيرة النبوية عشان وقت الواحد فينا يكون دايما منشغل في طاعة الله ونسأل الله له ولغيره الهداية ومرضاة الله عز وجل

  3. نصيحتي اللي عاوزه خطيبها يبطل
    نصيحتي اللي عاوزه خطيبها يبطل يعاكس غيرها تقسي عليه بس ما تغيب عنه وتكبر دماغها لو لقيته يتغل باخري سيستغرب ولكن بعد 3 مره سيسالها الا تغارين تجيبه لا انا اعلم اني امراه تعلم قدرها تدخل الي من باب ابي اما الاخريات فتدخل ليهم بنظرات الشيطان

  4. انا كمان عندي نفس المشكله
    انا كمان عندي نفس المشكله وبيقول انه ميقدرش يعيش من غيري وفعلا انفصلت عنه قبل كده وجري ورايا واتحايل عليا عشان ارجعله بس برده مش بيتغير انا دلوقتي بعامله بدون اهتمام بس بهتم بنفسي وبحسسه اني ممكن اضيع من ايده وهو بيحاول يثبتلي انه هيتغير بس انا عرفه لنه شويه وهيرجع ذي ماكان بس خلاص معدش ينفع اسيبه

  5. الطلاق مش حل بل بالعكس ده
    الطلاق مش حل بل بالعكس ده هروب من المشكله , يا بنت الناس البيوت تأسيسها و خرابها و هدمها مش بالسهل هو رجلك بتاعك انتي حقك انتي ليه تسيبيه لوحده اصلا هو مش من حقها , قبل اي حاجه خالي املك في ربنا كبير و فكري انه ابتلاء من ربنا و قربي من ربنا و صلي و ادعي لنفسك و لزوجك بالصلاح و اخلصي في دعوتك اوي و حاولي تقربيه من ربنا علي قد ما تقدي مش بغباوه و خناق لا بدهاء الانثه , تاني حاجه هو بيعمل اللي بيعمله ده علشان عارف ان في استقرار في البيت في الست اللي تتمناله الرضي يرضي بس دورك بقي انك تحسيسه ان الاستقرار ده بيتهز شويه بشويه يعني حاولي علي قد مل تقدري تغيري من نفسك روحي غيري لون شعرك مثلا اشتري هدوم جديده مثلا حاجات للبيت هو مش متعود ان ده النمط بتاعك حاجات ذي بتاعت الممثلات مثلا , هاتي كتب و مجلات اقرئيها و لو عندك موهبه ارجعي مارسيها متخليهوش هو اول اهتماماتك طبعا انتي بتعملي كل ده علشان هو اول و اخر اهتماماتك و احنا عايزينك انتي كمان تكوني اول و اخر اهتماماته , حولي تتجاهلي غراميته ديه و متتحسيسهوش انك واخده بالك منه لو قالك خارج تردي ببرود ماشي و متساليش رايح فين بس متزديش فيها ليحس انك رميتي طوبته خالاص , بلاش صوتك العالي في البيت متخليهوش يطفش فكري ايه اللي بيخليه يكلم غيرك هي بتتسهوك و بتتكلم بمنتهي الرومانسيه انتي بتتكلمي من جهة المسؤليه انك ام و زوجه و عمود اساسي في البيت انتي بقي دورك انك مثلا تكلميه في الشغل مثلا و بمنتهي الرقه تقولي كلام لطيف , اعملي ليه مفجأت لطيفه مش كوارس الله يهديكي , شوفي مثلا هو بيحب فريق ايه و افهمي عن تاريخ الفريق ده و ابداءي اتكلمي بطريقه حضاريه معاه مش خناق شوفي المجال اللي بيتكلم فيه او بيفهم فيه و اتعلميه او اقراءي فيه , يعني في النهايه عايزه اقولك دلعي نفسك و حسي بانوثتك اللي نستيها تحت بند المسؤليه اتغيري شديه للبيت و خليه يحس انه لو لف العالم دفرك ميسويش رقبتك اللي بيكلمهم دول كلهم شديه ليكي و لشخصيتك الجديده , يا بنت الناس ده جوزك و مش عيب انه يشوف فيكي المحترمه الوقوره و النعنوشه الفرفوشه و المنحله ان اتحتاج الامر , لكن فكرت انك تحسيسيه ان في حد تاني في حياتك و كده ده انتي كده هتحضري العفريت و مس هتعلافي تصرفيه ابدا طبيعة الراجل الشرقي غير كده خالص , و اخلصي النيه لله في عملك ده انك بتبتغي بيه وجه الله . ربنا يصلح لكي الحال يا رب العلميين .

    1. ده غلط لما يجيها أمراض جنسية…
      ده غلط لما يجيها أمراض جنسية ونفسية الدعاء مش بينفع. والطلاق أوفر…

  6. اهم حاجه الدعاء ادعي ربك
    اهم حاجه الدعاء ادعي ربك بالحاح وربك مش هيخيب ظنك فيه

  7. الجى لربناا وصلي وادعى ربناا
    الجى لربناا وصلي وادعى ربناا يصلح حاله ويقربه منك ويبعده عن سكه الستاات دى
    اينعم هو عينهم متملهااش الا التراب بس دا جوزك حااولى تشوفيه ال بيعجبه فيهم وانتى اعملى احسن منهم

  8. الست متحوزة من خمس سنوات
    الست متحوزة من خمس سنوات وعندها اطفال ببساطة كدا نقولها اطلقي لا طبعا تحاول معاه مرة واتنين وعشرة وتخوفه من ربنا خصوصا ان عنده بنت الحتة دي بتاثر فالرجالة حدا وطبعا تدعي ربنا كتييير انه يهديهواها

  9. انتى قولتى جوزك بيتجنن كل
    انتى قولتى جوزك بيتجنن كل مابيشوف ست حلوه
    أنتى كدا قولتى الحل
    خلى جوزك يشوف فيكى اللى بيشوفه فى الستات الحلوه دى واعملى اللى بيعملوه

  10. التعليق الاخير كان احد افكاري
    التعليق الاخير كان احد افكاري بس يا جماعة هي مش خانقة وفيلم عصابات ، مين يغير علي التاني اكتر او تشغله ازاي وكل الكلام المستهلك دا ، وفي حالات كتير مش بجيب نتيجة لان التغيير لازم يكون من داخل الانسان وموافق عليه.
    هما المفروض يفكروا في حياتهم ومستقبل اولادهم .
    الحل بتاع البسله واهتمي بنفسك واتغيري واتحوري واستخدمي ذكاء الانثي وبلاش هروب ومتخليش واحدة تاخده منكم ، دا لم يكون الموضوع كل فترة وفعلا تكون ست ست يعني ومرة مرتين، لكن جوزها لو شاف تاء تأنيث في الشارع هيموت عليها . انا من وجهة نظري دا زوج فاجر ، خيانة وضرب واذا كان عجبها .
    الطلاق بالنسبة لي هو الحل لكن هنقول انها تحاول كل المحاولات لانه فعلا بعد كدا هيتحول الموضوع لفضايح صحبت بنته ، مامت صحبت بنته ، مراته ابنه والحاجات دي كلها احنا عارفنها وبلاش ندفن رأسنا في الرمل كالمعتاد.
    الجزء الاهم دي اب ازاي هيكون قدوة لاولاده ازاي بنته متكنش مكسوفة وهي خارجة معها ، ازاي يكون قدوة لابنه انه يعف نفسه ويسيطر عليها ويتقي الله.

  11. انا كمان بعانى من نفس…
    انا كمان بعانى من نفس المشكله جوزى كل شويه مع واحده وانا هموت من الشك اللى انا عايشه فيه طول الوقت مش قادرة اركز مع العيال ولا قادرة افرح الخيانه حاجه صعب انا عارفها واعرف جوزها لانه صاحب جوزى بس مش عارفه اعمل معها ايه نفسي انتقم منها حد يريحنى والنبي

    1. أهلاً شيماء،…

      أهلاً شيماء،

      هل أنتِ متأكدة أن زوجك يخونك مع تلك المرأة؟ أم أنها مجرد شكوك؟

      أحياناً تجعلنا الغيرة نرسم قصص خيالية في أذهاننا، ونصدقها، مما قد يدمر العلاقة. إذا كنتِ متأكدة، فتحتاجين لمواجهة زوجك. أما إذا كانت مجرد شكوك، فقد يكون من الأفضل التحلي بالثقة بالنفس والإنتظار حتى تظهر أدلة لشكوكك قبل أن تدمري العلاقة بينك وبين زوجك.

      ننصحك أيضاً بقراءة المقال التالي عن الغيرة، أسبابها وطرق التخلص منها

      https://lmarabic.com/love-and-relationships/relationship-problems/jealousy-top-five-facts

      فريق التحرير

       

الحب ثقافة

مشروع الحب ثقافة يهدف لنقاش مواضيع عن الصحة الجنسية والإنجابية والعلاقات