كلام جاب كل ست ورا
هذا المقال فرصة لكِ ولكَ لإضافة “كلام الناس اللي جاب الستات ورا”، وأضعف من عزيمتهن ومن قدرتهن على مواجهة الإساءة والعنف والتحرش في الشارع أو البيت أو العمل.
لا أعرف فتاة، في أي مرحلة من عمرها، لم تسمع جملة “الناس يقولوا إيه؟” على الأقل مرة في حياتها. تكبر الفتاة وتحمل هم “كلام الناس” وتدفع من راحتها وكرامتها ثمناً باهظاً لتفادي “كلام الناس… اللي هياكلوا وشها”.
في قصة “جحا وكلام الناس”، أدرك “جحا” أن رضاء الناس غاية لا تدرك. تخصص “الناس” في توجيه “الكلام” للأنثى بدون وجه حق أو دعوة وكأن للمجتمع قاموس يحميه.
هذا المقال فرصة لكِ ولكَ لإضافة “كلام الناس اللي جاب الستات ورا”، وأضعف من عزيمتهن ومن قدرتهن على مواجهة الإساءة والعنف والتحرش في الشارع أو البيت أو العمل.
اتركوا إضافاتكم أسفل المقال!
مواقف العنف الزوجي ضد المرأة ورد المجتمع:
- رجل يهمل زوجته عاطفياً
– المجتمع: أنتِ بتتدلعي! خلفي عيل يشغلك! المهم أنه كسيب ومكفيكِ.
تلاقيكِ طلبتي فلوس!
- رجل يسخر من زوجته ضاحكاً مشيراً إليها بسبابته
– المجتمع: هو كان كفر يعني؟ اعملي عملية تجميل في مناخيرك! اعملي من بنها!
- رجل يضرب زوجته أمام أطفالهما
– المجتمع: مرتان في ثماني سنوات مش قصة! ما هو أنتِ اللي عصبتيه!
المهم أنه كسيب ومكفيكِ.
- رجل يخون زوجته
– المجتمع: كلهم كده! المهم أنه بيرجعلك أخر الليل! بكرة يعقل!
- رجل يجبر زوجته على ممارسة الجنس معه
– المجتمع: وماله ما هو حقه! الملايكة هتلعنك! أنتِ ناشز!
- امرأة تريد الطلاق
– المجتمع: خليكِ معاه وأمني مستقبلك! خليه يكتب الشقة باسمك! هتصرفي منين؟ سمعتك هتبقى في الأرض!
المهم أنه بيرجعلك أخر الليل!
- رجل يعد زوجته المضروبة بأنه سيتغير ويطلب منها أن تسامحه
– المجتمع: اديله فرصة! عرف غلطته أهو! ما تحرميش الولاد من أبوهم!
- رجل يلوم زوجته بعد ضربها
– المجتمع: عنده حق! تلاقيكِ طلبتي فلوس! تلاقيكِ استلمتيه أول ما رجع من الشغل!
مواقف التحرش الجنسي في الشارع والعمل ورد المجتمع:
- صايع بيتحرش بواحدة
– المجتمع: لبسها السبب! إيه اللي وداها هناك؟!
- عجوز يظهر قضيبه لفتاة في الشارع
– المجتمع: أنتِ اللي أغرتيه! إيش خد الريح من البلاط!
- فتاة تقاوم المتحرش
– المجتمع: هتبهدلي راجل قد أبوكي؟ هتبهدلي شاب زي أخوكي؟! دا عيل!
إيش خد الريح من البلاط!
- مدير يتحرش بموظفة
– المجتمع: هي اللي عاوزة تتعاكس! أمال نازلة الشغل ليه؟ ما هي لابسة محزق! ما هي لابسة عريان! ما هي بتتدلع في الكلام! أسلوبها طمعه فيها!
- صايع بيلقح كلام على واحدة ماشية في حالها
– المجتمع: البنات بيحبوا كده! تلاقيها مبسوطة ما دام ساكتة! أكيد زبالة وإلا ما كانش عاكسها!
تلاقيها مبسوطة ما دام ساكتة!
“كلام الناس” الذي يمنع المرأة من الخروج من دائرة العنف
- لو اتكلمتِ الناس هتاكل وشك
- اقعدي في بيتكم أحسن
- هيقولوا عيلة مفككة
- ما تحكيش ما تشتكيش ما تطلعيش أسرار بيتك بره
- بين الراجل ومراته مافيش كرامة
- جوزك وهو حر فيكي
- ما هو راجل يعمل ما بداله
- أصلك عاوزة تمشي على حل شعرك
- ما عندناش بنات تطلق
- ما عندناش بنت تغضب وتسيب بيت جوزها
- عيشي والسلام
- ضل راجل ولا ضل حيطة
- استحملي عشان خاطر العيال
- الراجل راجل والست ست
- ما تخربيش على نفسك وعيشي
- أنتِ مش قد الطلاق
- أنتِ مش قد أقسام البوليس
- أنتِ مش حمل محاكم
اترك تعليقاً
آخر التعليقات (5)
انتي مابتسعيش الكلام عشان…
انتي مابتسعيش الكلام عشان كده هو بيديكي علي دماغك
انتي عنيده وانا هكسرلك دماغك
اول ما تاخدي خطوه لنجاحك هي الست ليها غير بيتها
تحياتي للأستاذة داليا والله…
تحياتي للأستاذة داليا والله دخلت ف الصميم احنا المصاصة اللي بيتلم عليها الدبان وهما ميت فل وعشره ناقص يدفنونا بالحيا زي زمان
بلح….كل الكلام ده بلح احنا…
بلح….كل الكلام ده بلح احنا كمجتمع شرقى عندنا تراث عفن من احتقار الانسان فى العموم والانثى بالاخص ولتحقيق المساوه بين الرجل والمراءه طبقوا حقوق الانسان لكن اعمى بيوصف الطريق لاعمى زيه مش هنوصل لحاجه
لما تعليقى على الموضوع يتحط…
لما تعليقى على الموضوع يتحط تحت المرجعه عشان يتنشر يبقى مفيش حرية خايفين من اى الفاظ خارجه عن السياق مع ان طريقه التعبير والكلمات المستخدمه للتعبير هى انعكاس لصوره المجتمع المعاصر يعنى لو الاسلوب راقى والافاظ منمقه يبقى المجتمع متحضر و لو الاسلوب خاوى والافاظ خارجه يبقى مجتمع بدائى سفيه ولما يبقى فى رقابه يبقى مجتمع كاذب يدعى التحضر و الحريه ….عشان كده الكلام ده بلح لتانى مره عشان المفروض انكوا موقع محترم والمتابعين برضه محترمين زى المحتوى الفكرى الى بيقدمه الموقع زى مالفكره ان الحب ثقافه الاختلاف فى الرأى ثقافه
أهلاً بك، جميع التعليقات على…
أهلاً بك، جميع التعليقات على موقع الحب ثقافة تخضع للمراجعة من قبل منسقي الموقع قبل نشرها للتأكد من عدم وجود ما يخالف قواعد الموقع مثل توجيه إهانات أو ألفاظ جارحة أو الهجوم على المستخدمين الآخرين.
لم ولن نقوم أبداً بحظر أو حذف أي تعليق لمجرد الاختلاف في الرأي فنحن بموقع الحب ثقافة نرحب بجميع الآراء ونشجع على النقاش البناء ما دام في حدود اللياقة ولا يحتوي على هجوم أو تجريح لشخص أو مجموعة أشخاص بعينهم.
لقد قمنا بنشر تعليقك بعد مراجعته، نسعد باستقبال تعليقاتك واستفساراتك في أي وقت.
تحياتنا